 Colloquium I |
Colloquium III  |
Personae:
Stephanus, Praeceptor.
S.
Salve, praeceptor.
P.
Salvus sis, mi Stephanio. Unde venis tam multo mane?
S.
E cubiculo nostro.
P.
Quando surrexisti?
S.
Paulo ante sextam, praeceptor.
P.
Quid ais?
S.
Sic est ut dico.
P.
Tu nimis es matutinus; quis te expergefecit?
S.
Frater meus.
P.
An precatus es Deum?
S.
Cum primum frater me pexuit, precatus sum.
P.
Quomodo?
S.
Flexis genibus et coniunctis manibus, dixi precationem Dominicam cum gratiarum actione.
P.
Qua lingua?
S.
Anglica.
P.
O factum bene! quis te misit ad me?
S.
Nemo.
P.
Quid ergo?
S.
Ultro veni.
P.
Mi animule, quam pulchrum est sapere! Nonne est ientandi tempus?
S.
Nondum esurio.
P.
Quid vis igitur?
S.
Volo reddere nomina quotidiana, si tibi placet audire me.
P.
Quidni placeret? tenes igitur memoria?
S.
Teneo, gratias Deo.
P.
Age, pronuncia.
S.
Sed mihi soles praeire Anglice, et ego Latine respondeo.
P.
Bene mones; pene istud oblitus eram: responde igitur.
S.
Exspecto ut proponas.
P.
The head.
S.
Caput.
P.
The top of the head.
S.
Vertex.
P.
The fore-part.
S.
Sinciput.
P.
The hinder-part.
S.
Occiput.
P.
Nunc responde Anglice. Caput.
S.
The head.
P.
Vertex.
S.
The top of the head.
P.
Sinciput.
S.
The fore-part.
P.
Occiput.
S.
The hinder-part.
P.
Quid si nunc solus dicas omnia?
S.
Facile dicam.
P.
Ego vero te libenter audiam.
S.
Caput, The head.
Vertex, The top of the head.
Sinciput, The fore-part.
Occiput, The hinder-part.
Nonne bene dixi, praeceptor?
P.
Quam optime.
S.
Laudetur Dominus Deus.
P.
O pulchrum verbum! Ito nunc petitum ab ancilla ientaculum.
S.
Malim abs te accipere, praeceptor, si tibi non est molestum.
P.
O quam te amo de isto verbo! age, sequere me: dabo tibi aliquid boni, quia tuum recte fecisti officium. Quid est hoc?
S.
Panis candidus, White bread.
P.
Quid haec sunt?
S.
Ficus aridae, Dry figs.
P.
Numera.
S.
Una, duae, tres, quatuor, quinque, sex.
P.
O lepidum capitulum! Ienta nunc otiose.