 74. The Treasure Seekers |
76. A Dangerous Conspiracy (Continued)  |
Ōlim in fīnibus Indōrum ab Americānīs cōnstitūta est prōvincia maxima, ex quā pars quaedam etiam nunc Indiāna appellātur. Prōvinciā cōnstitutā rēx Indus, nomine Tecumsa, quī nē cīvēs suī brevī patriam tōtam dīmitterent timēre coeperat, omnibus locīs palam dicere nōn dubitāvit sine cōnsēnsū omnium nātiōnum Indīs agrum nullum vēndendum esse; ac postrēmō, conciliīs undique convocātīs, barbarōs hortātus est ut sē sequerentur hostīsque invīsōs ē fīnibus suīs expellerent.
Deinde, cum ad caput provinciae lēgātl conveniendī causā iter fēcisset, quamquam in lēgātī aedium vestibulō ipsi comitibusque subsellia posita erant, ibi sedēre nōluit: terram enim cōnfīrmāvit esse Indōrum mātrem, sēque in eā stāre mālle; itaque lēgātus ad colloquium in silvam prōgredī coactus est. Ibi dum colloquuntur, Tecumsa vehementer est īrā commōtus, eiusque comitēs secūrīs cōnfēstim arripuērunt. Sed Americānī pauci, quī adstābant, statim expediērunt arma, mīlitēsque summā celeritate ad lēgātum dēfendendum adcurrērunt; quibus rēbus territī, Indī nihil tum ausī sunt. At lēgātus, quī plānē sentiēbat cum barbarīs sibi mox dīmicandum esse, cōpiās satis magnās quam celerrimē cōgere coepit. Tecumsa interim, ut omnīs Indōs ad arma vocāret, reliquās gentēs dīligenter iam circumībat.