Migne Patrologia Latina Tomus 80
Versus ad Bertichramnum (Fortunatus), J. P. Migne
I. Ad Bertichramnum episcopum, cum elevaretur in currum.
(0387B)
Curriculi genus est, memorat quod Gallia rhedam,
Molliter incedens orbita sulcat humum.
Exsiliens duplici bijugo volat axe citato,
Atque movet rapidas juncta quadriga rotas.
Huc ego dum famulans comitatu jungor eodem,
Et mea membra cito dum veherentur equo,
Pontificisque sacri Bertichramni actus honore,
Comprehendente manu raptus in axe levor.
Qualiter implumes fetus pia mater hirundo
Confovet, et placide pennula tensa regit;
Sic bonitate potens, affectu dives opimo,
In proprium pastor molle sedile locat.
(0387C)Nec solum amplectens pia mens, sed diligit omnes,
Unde magis populis unicus exstet amor.
II. Ad eumdem de opusculis suis (ejus ).
Ardua suscepi missis epigrammata chartis,
(0388B)Atque cothurnato verba rotata Sapho.
Percurrens tumido spumantia carmina versu,
Credidi in undoso me dare vela freto.
Plana procellosos ructavit pagina fluctus,
Et velut Oceanus ( Oceanas ) fonte refudit aquas.
Vix modo tam nitido pomposa poemata cultu,
Audit Trajano Roma verenda foro.
Quid si tale decus recitasset in aure senatus?
Stravissent blandis aurea fila tuis.
Per loca, per populos, per compita cuncta videres
Currere versiculos, plebe favente, tuos.
Sed tamen in vestro quaedam sermone notavi,
Carmine de veteri furta novella loqui.
Ex quibus in paucis superaddita syllaba fregit,
Ex pede laesa suo musica clauda jacet.
(0388C)Nunc, venerande Pater, prece, voto, voce saluto,
Commendans animum supplice corde meum.
Sit tua vita diu, cujus modulante camaena,
Cogimur optatis reddere verba jocis.