Migne Patrologia Latina Tomus 102
Versus Smaragdi (Smaragdus S. Michaelis), J. P. Migne
Versus Smaragdi
(0015A)
Quisquis amas typicos legis cognoscere sensus
Vitalesque cupis doctorum carpere fructus,
Istius egregii calamum perquire libelli,
Discute paginulas solers et mente sagaci
Quid teneat typicum sublato tegmine disce.
Pabula fert animae verbo condita salutis,
Pollet et in sacris nimium typicisque figuris,
Sensibus elucet, laeto sermone nitescit
Argenti nitidos distincto limite campos,
Et nimium gravidos divino munere cunctos
Ordine multidico consperso semine vatum
Continet in gremio digestos iste libellus.
Aurea de quorum proprio sudore recisa
Rure, favente Deo, Patres traxere metalla,(0015B)
A quibus eximios, nitido sermone repletos,(0016A)
Sum proprio nisus modulo componere libros.
Ex quibus hunc modicum sacro charismate plenum,
Inspirante Deo, volui conjungere librum.
Qui mihi perspicue difflorans Dindyma legis
Quae tenet in sacris monstret nudata figuris,
Abdita qui reseret, nec non qui mystica pandat.
Profert in medium sacro cum dogmate cuncta
Quae latuere diu caeco sub tegmine clausa.
Qui rutilus nocuas pellat de mente latebras,
Vincula disrumpat, cordis eliminet umbras
Inradietque sacro mentis spiramine fibras,
Ut valeat vobis divino semine jacto
Rore poli madidus, doctorum vomere cultus,
Cordis opimus ager, centenos reddere fructus.