Migne Patrologia Latina Tomus 139a
Testimonia veterum et recentiorum (Auctores varii), J. P. Migne
cc_id: cps_2.AucVar.TeVeEtR, cc_idno: 9765
Fulberti, episcopi Carnotensis, epistola 21. 139.0419A|
Pleno virtutis, et gratia circumfuso, charissimo Patri Abboni, Fulbertus suus. Quanam te resalutatione digner, o sacer abba, o magne philosophe?
Sigeberti monachi Gemblacensis, in libro De illustribus Ecclesiae scriptoribus, capite 140.
Abbo abbas Floriacensis quantum valuerit in utraque scientia ostendit, cum super calculum Victorii commentatus est. Martyr obiit.
Ejusdem, in Chronographia, ad annum 994.
Abbo abbas Floriacensis, qui super calculum Victorii commentatus est.
Senati Bravonii, in Vita sancti Osvaldi.
Porro in monasterio Rameseiae Abbo Floriacensem monachum degere voluit morum sanctitate praeclarum, et litteris egregie eruditum, ut monachos doceret, scholis praeesset, et tum regularem sive 139.0419B| monasticam disciplinam, tum litterarum scientiam promoveret. Is Abbo, Dunstani hortatu, beati Edmundi regis et martyris passionem accurate conscripsit. Tandem Floriacum reversus, et illic abbas effectus, a suis monachis occisus est.
Trithemii abbatis, libro De scriptoribus ecclesiasticis.
Abbo, Floriacensis monasterii abbas, ordinis Sancti Benedicti, vir in divinis Scripturis jugi lectione et studio exercitatus, et in saecularibus disciplinis egregie doctus, vita quoque et conversatione insignis, et usque ad martyrii coronam dignus comprobatus. 139.0420A| Dum in Vasconia verbum Dei praedicaret, fidei christianae testis sanguinis effusione factus est. Scripsit super calculo Victorii librum unum, additiones in eumdem, librum unum, et quaedam alia. Claruit temporibus Ottonis primi, anno Domini 970.
Jacobi Philippi Bergomatis, Chronicorum libro XII, ad annum 982.
Abbo etiam Floriacensis abbas: vir in divinis Scripturis admodum exercitatus, atque in saecularibus disciplinis egregie doctus, ita quoque et mira conversatione insignis, etc., ut Trithemius.
Conradi Gesneri, in Bibliotheca.
¶
Abbo Floriacensis coenobii abbas, Gallus, Aurelianensis, scripsit Vitae Eadmundi martyris libros duos; apologeticum ad Francorum reges librum unum; et super calculo Victorii librum unum; additiones in eumdem librum unum; de motibus stellarum librum unum; de planetarum cursu librum 139.0420B| unum; Epistolas ad Gregorium Quintum, Ottonem imperatorem, Robertum regem, Bernardum Bellilocum, Odilonem Cluniacensem; Demonstrationum astronomicarum librum unum; contra episcopum Aurelianensem librum unum; Categoriarum spiritualium librum unum; de Computo librum unum, Homiliarum in Evangelia librum unum; de Coena Domini librum unum; de sancto Stephano martyre Sequentiam unam, Responsoria quaedam: Circulos annorum incarnationis Dominicae ad sua tempora correxit. Obiit anno 1004, a suis monachis interfectus. Ejus Vitam scripsit Aimoinus Floriacensis.