 LIX |
LXI  |
In mortem Stephani Nazarians oriental. ling. professoris Mosquensis.
Non aere fulvo, non Pario tibi
Surgit sepulcrum marmore candidum
Nec usitata quaeris arte
Nomen ab excidio tueri.
Sed scripta, quorum vis animos movet,
Et vita sanctis acta laboribus
Fecere, ut inter nos morari
Post obitum videaris idem.
Quare ecce ramum Palladium tua
Dextra rigatum nunc tibi deferunt
Sermonis ornatus novellus
Et populi viridis propago.
Tutus quiescas sub tumulo licet:
Nam quod Prometheus cum face lucida
Caecis es exortus tenebris,
Laurea te decorat merentem.
Fatis videtur sic placitum, ut boni
Communis in te susciperes onus
Devotus unus, nec tibi umquam
Contigit inde frui quiete.
Nam qui labori se dedit utili,
Spinas acutas fert pretium sibi.
At te fatigatum sub auris
Mollis humi foveat cubile.