 II |
IV  |
ACTUS III, SCENA i
Rex obrudit Semiramidi litteras Bactrorum regis, et ream perfidiae agit. Agnoscit illa non ad se, sed ad alteram Semiramidem nomine Dorili textam datas, sed ne hanc prodat, se non exculpat. Ideoque carceri mancipatur.
NINUS, CONSILIUM REGIUM, SEMIRAMIS
SEM. Adoro sacras regiae frontis notas,
Tuisque promptam iussibus mentem adfero.
NIN. Perspecta nobis rebus in summis fides
In te reclinat, Nympha, convulsae spei
Si quid supersit. Persis in ferrum ruit 1050
Regi rebellis, Indus aggesto fremit
Marte metuendus. Bactra se rursum movent,
Quosque tua virtus posuit, excutiunt lupos,
Nostrisque rursus impiam regnis trahunt
Cladem per arma. Martis at nondum tui 1055
Consumpta virtus. Illa dum vivit, meis
Stat firma regnis gloria, et populis salus.
Tuam reposco dexteram, certum meae
Clypeum salutis. SEM. Sanguinem et vitam pete,
Nam quidquid imo spiritus fervet sinu, 1060
Tuae saluti fervet, atque ardet suo
Servare vitae regium interitu caput.
NIN. An Bactriani fervet in regis minas?
SEM. Cuius superbos spiritus fregi manu,
Soliumque ferro subrui, cuius pede 1065
Victorioso vile calcavi caput.
Quod si tumentes erigit cristas, tuo
Capiti minatus, dextera hac audax caput
Collo recidam, et pabulum corvis dabo.
NIN. Ne lude regem, Nympha; te numen suum 1070
Adorat ille teque amat, honorat, colit.
Et tu (quod esse barbarum reor) vices
Reddes amori vulnera, et caedem, et necem?
SEM. Ego verendum verticis, Princeps, tui
Adoro solem. Quisquis hunc bello petit, 1075
Hunc ego peremptum victimam Acheronti dabo.
NIN. Ille tibi partem cordis in munus dedit.
SEM. Ille mihi munus? Ille cor mihi dedit?
NIN. Non ille gemmas misit, ac gemmis suos
Miscuit amores? SEM. Ludis aut purum mihi 1080
Aenigma narras. NIN. Solvo nodum aenigmatis.
SEM. Imo chymeras nectis et monstra implicas.
NIN. Tuae involuta monstra perfidiae explico.
SEM. Ego rea tanti criminis? Rex es. Fero
Quodcunque torques fulmen, et linguam premo.1085
NIN. Rex sum, nec esse liber insidiis suis,
Scelerata, possum. SEM. Rebus obscuris diem
Affunde, Princeps. Si Semiramidem ream
Perfidia fecit, ede perfidiae notas.
NIN. Satis ipsa prodis. SEM. Quidquid in meo est sinu, 1090
Est purus animi candor, est constans fides.
NIN. Est fraus, dolusque, et pectori innatus Draco.
SEM. In innocentis pectus immanem iacis
Princeps sagittam. NIN. Nullus est arcus mihi.
SEM. Sed lingua acuta grandius vulnus facit.1095
NIN. Hic sunt sagittae, hic arcus est. SEM. In me evibra.
En, pando pectus. NIN. Nolo regalem manum
Contaminare. Tu ipsa tibi plagam imprime.
Vide nefandi sceleris infames notas.
Ostendit litteras.
Est nota dextra; nomen auctoris lege. 1100
SEM. Rex Bactrianus. NIN. Reliqua sunt animi tui,
Fideique pulchra elogia. Lege. SEM. Semiramis
Legit litteras.
Unica voluptas, magna pars animi me . . .
Reliqua silenter legit.
O monstra sortis! Sum innocens et sum rea;
Sum perfida et fidelis; et pia et impia. 1105
NIN. Perge, lege: vota, munera, venenum improbus
Affectus in te Dorili—nempe haec vocas
Meas chymeras! SEM. Verba quae in lingua haesitant,
Fauces resorbent, attonat mentem stupor,
Rigidumque timida membra constringit gelu. 1110
Solum hoc loqui conceditur: non sum nocens
Sed sum nocenti similis. NIN. O te perfidam!
Sperare nempe hoc poterat infelix Ninus,
Post tot favores regios, post tot sui
Amoris in te signa, ut arcanos dolos, 1115
Secreta pacta, et foedera in sacrum caput
Cum rege inires hoste? Detrectat fides,
Quae spectat oculus. Video perfidiae impiae
Immane monstrum. Et potuit humano locum
Reperire corde tam Draconinum scelus, 1120
Nisi cor sit Orco proditum, et puro Stygis
Pastum veneno? SEM. Labis immunis mihi, red
Et innocentis pectoris pura est fides.
NIN. Circumvenire fraudibus regem, Ninum
Prodere inimicis, pectoris pura est fides? 1125
SEM. Perfidia, rex, est cuius invisum mihi
Est nomen ipsum et incapax mentis sinus.
NIN. Hic te character damnat. SEM. At magis meum
Silentium. NIN. Loquere. SEM. Haud licet. NIN. Quis te vetat?
SEM. Ipsa innocentia. Si loquar, fiam nocens. 1130
NIN. Nec verba nec silentium prosunt. Tua
Perfidia certa est. SEM. Nulla perfidia mea est,
Sed vana larva. NIN. Vera sat notus tibi
Loquitur character. SEM. Vera? Sum tamen innocens.
NIN. O impudentis contumax oris lues. 1135
Convicta plene es sceleris, et scelus negas?
SEM. Modestus oris sermo se sua tegit
Integritate. NIN. Ferre non ultra tuam
Valeo, proterva, audaciam. SEM. At tantum probrum
Tamque insolens ego pectore infracto fero. 1140
NIN. Quid verba serimus? Turris ad tetrum specum
Abi, scelesta. Forsan obscuro tibi
Lux dabitur antro, qua tuum videas scelus.
SEM. Non metuit umbras innocens. Circum licet
Nox atra tenebris horreat semper dies 1145
Est innocenti. Corpus in opaco potest
Iacere, at animus ipse sibi pura est dies.
bar
ACTUS III, SCENA ij
Osmanus et Arbaces gaudent Semiramidem esse carceri mancipatam.
ARBACES, OSMANUS
ARB. Quid haesitamus! Nostra sublimem inserit
Fortuna Olympo verticem. Semiramis
Mediis in umbris turris inamoenae gemit.1150
Haec illa nempe est regia Hymenaei novi,
Hic coniugalis thalamus. O charta, aspidis
Vel scripta succo, felle vel Stygii canis.
OSM. Nondum peractum praelium est, et iam, Arbaces,
Canis triumphum? Non obit Semiramis, 1155
Nec flamma amoris omnis extincta in Nino est,
Sed languet. Unum sufficit suspirium
Ut excitetur. ARB. Vivere hic amor nequit.
Charta illa pestis horrida est. Si oculos semel
Tetigit veneno, penetrat in cordis sinum, 1160
Omnemque, si quis vixit, affectum necat.
Quodsi character toxicum infirmum foret,
Vires veneni noster augebit dolus,
Et asperabit plaga ineluctabile
Virus secunda. OSM. Fraudibus nunquam deest 1165
Mens, et in arena consilium et audax manus.
Spargere licebit littore ab Eoo tubam
Sonare Martis, Persiam interitum Nini
Portare in armis, Bactra revoluta vice
Erigere cristas. Fama sic mendax metus 1170
Veros ciebit. Credulus regum est timor.
Hinc facile nostris fraudibus pandet locum.
bar
ACTUS III, SCENA iii
Leander red narrat Memnoni Semiramidis casum. Suspicatur hic fraudem. Dorilus suadet, ut sui militis auxilio succurrat Semiramidi. Non assentitur Memnon.
MEMNON, HYDASPES, DORILUS, LEANDER, GORBIAS
MEM. Tracta est pudendum in carcerem Semiramis?
DOR. Et adhuc minatur mortis horrendae ultima
Supplicia princeps. MEM. Cuius est sceleris rea? 1175
GORB. A Bactriano rege suspectas notas
Noxiaque dona nuncius tectus tulit.
MEM. Heu me! Quod iste nuncius fulmen dabit!
LEAN. Rex in furores agitur et versat minas,
Iamiamque ferrum librat, ut merita ferat 1180
Supplicia sceleri. HYD. Terra sub pedibus mihi
Tremere videtur, cardine et vulsus suo
Crepare Olympus. DOR. Sol mihi in noctem retro
Agi, et reflexis curribus mergi dies.
MEM. Sed quas nefandi sceleris invenit notas? 1185
Quod crimen urget? LEAN. Proditi regni ream,
Perfidiae apertae complicem, atrocem impiae
Fraudis magistram voce repetita vocat.
DOR. In innocentem probra vesanus furor
Iaculatur ista. Candidae mentis fides 1190
Abhorret ista nomina. Et credam prius
A Sole posse noctis horrores pati
Quam tam fidele pectus hac tangi lue.
MEM. Quid illa? LE. Mente interrita constans sui
Secura, fronte limpida, qualis solet 1195
Integritatis esse, sese innoxiam
Puramque contestatur. DOR. Hic caeco dolus
Errore serpit. Aula livoris parens
Et architecta fraudis in tales solet
Turgere partus. Pestilens Hydrae malum 1200
Periculorum fertile est. Certo cadit
Ictu securis in Semiramidem nisi
Medicina tanto prompta succurrat malo,
Qua suspicacis ira placetur Nini.
Aut impetretur aestui insano mora. 1205
HYD. Attemperari suspicax nescit furor,
Et saepe ab ipsis ira blanditiis tumet.
DOR. Aliunde quando nulla spes fulget, furor
Ministret arma; quodque non speras prece
Posse obtinere, Marte violento erue. 1210
MEM.Quid mente Memnon pendula agitaris diu?
Nocet esse cautum, quando discrimen prope est
Moraque crescit. Saepe prudentem fugit
Fortuna, quae se donat animosos in manus.
Coniux in antro est turris — et lentus stupes? 1215
Nec ad arma properas? Funus expectas prius
Videre, quam remedia supremo malo
Adferre? Ferro vindice, incensa face,
Nimbis, procellis, turbine, Acherontis furor,
Invade turrim, dirue obstantes moras, 1220
Totumque ab imis sedibus specum erue.
Quid anima clausa pectore enervi lates?
Per scissa prodi membra, per hiantes cavis
Vulneribus artus. Eripe illecebras tuas
Antri tenebris, antequam innocuae caput 1225
Cadat in securim. Sed quis in praeceps me amor
Male cautus urget? Incitus regum furor
Non bene per arma sistitur. Ab ipsis aquis
Saepe invalescit ignis, et vires malum
Capit a medela. GORB. Miles in tua est manu 1230
Tuoque paret nutui. In campum evola,
Validamque coge militis lecti manum;
Oppone regis aestui. Haec certo obiice
Torrentis iram sistet, et atroci dabit
Meliora menti sensa, ne praeceps furor 1235
In tam nefandae caedis exemplum ruat.
MEM. Fides mea istud prohibet. Agnosco meum
Caput esse regem, et Memnonem regis manum.
Infida manus est illa, quae in caput impia
Assumit arma. DOR. At interim aspectu horrido 1240
Furor calorem frontis innocuae obterit.
MEM. Meliora pectus sensa condiscet mora.
bar
ACTUS III, SCENA iiii
Aemuli Semiramidis spargunt novi in regem belli rumores, ut accelerent Semiramidis mortem.
NINUS, FARNABAZUS, PHILINDER, OSMANUS, ARBACES, NARBASSUS, LEANDER
NIN. Quid iste torvae frontis aspectus notat?
PHIL. Inamoena regi nuncia, et forte ultimam
Cladem tuorum. NIN. Spectra tibi fingis; tamen 1245
Effare, quod mihi nuncium inamoenum putas?
PHIL. A Gange et Indo turbo congestis volat
Metuendus armis, iamque se propius tua
In regna fundit. Ipse, qui accisus nequit,
In fratre Martis turbines novos ciet 1250
Rex Bactrianus, namque Cassanus sui
Fratris ruinam ulturus in campo fremit,
Suisque nostras portat in signis neces.
NIN. Aliunde perflet turbo qui regem petat.
Nihil hinc timendum est. Indus imbelles habet 1255
Ad arma populos; quique cum Mavors calet,
Fuga saluti consulunt. Veniat, suas
Disponat acies. Vix mei Martis levem
Spectabit umbram, protinus versa fuga
Pavidus volantis flabra praevertet Noti. 1260
NARB. Qualis oriente sole quae circumiacet
Nebula repente solvitur; talis tui
Ad arma Martis hostium nimbus cadet.
OSM. Sed in profundo grandius quoddam malum
Spectare videor. Illa quam mendax tulit 1265
Bactris Alethes, pagina, propinquos dolos
In te tuosque nunciat. NIN. Visa et mihi est
Res involuta fraudibus: tanti faces
Profiteri amoris, gemmeo precio addere
Mortale virus — ista quis sapiens putet 1270
Vacare fraude? FAR. Refugus auditus mihi,
Necdum ista in imum cordis admittit sinum.
Nimium remoto a littore hic rumor sonat.
Periculorum fama verorum prius
Labitur ad aures regias; post se trahit 1275
Ad plebis undas. NIN. Nuncium nullum mihi,
Aut charta tanti turbinis testis data est.
Peccare sed si cogimur, cauto velim
Peccare sensu. NAR. Regibus rerum fides
Ut certa detur, non sat est quaevis facis 1280
Scintilla dubiae. Veritas, expers doli,
Maiore luce radiat. At seu sint mera
Figmenta vulgi, et credulus plebis timor,
Seu vera famae nuncia, hoc demum decet,
Adimere Bactris omne fulcimen spei. 1285
Quid ergo servas carceris clausam specu,
Quae iam suae convicta perfidiae est rea?
bar
ACTUS III. SCENA v
Memnon regi supplex petit Semiramidis liberationem. Rex iubet eam tribunali sisti.
MEMNON ET QUI SUPRA
MEM. Rex, advolutus pedibus augustis, meum
Prosterno honorem, gloriam, famam, decus
Per bella partum, sanguinem, vitam, et caput. 1290
NIN. Quae vota poscis? MEM. Memnoni ut collo caput
Istud revellas. Si rea est Semiramis,
Ego nocentem reddidi, et fio nocens.
NIN. Nec umbra sceleris Memnonem aut species doli
Facit nocentem. MEM. Quis Semiramidem vapor 1295
Afflare potuit fraudis, ignaram doli,
Synceritatis imaginem, idaeam boni?
NIN. Non umbra, non phantasma, non fictae ream
Fecere larvae. Clarior puro die
Perfidia patuit. Pacta regale in caput 1300
Cum Bactriano rege fecerunt ream.
Te statuo sceleris iudicem. Huc ream advoca.
Huc uniones, toxicum, et gemmas ferat.
Abit Farnabazus iussa expediturus.
MEM. Sit lenta iusti iudicis sententia.
Aequum ac iniquum lenta discernit mora. 1305
NIN. Matura inerte poma putrescunt mora.
MEM. Acerba sed iudicia maturat mora.
NIN. Maturat illa iudicis sensus sagax.
MEM. Qui, quo resolvit lentius, plura inspicit.
NIN. Qui, quo resolvit lentius, gravius quoque 1310
Periclitatur. MEM. In potestate est tua
Reo statuere supplicia, quando lubet.
bar
ACTUS III, SCENA vj
Semiramis communi Consiliariorum suffragio ad mortem condemnatur. Philinder nuntiat moveri militem ob Semiramidis captivitatem. Mittitur Memnon, ut motum componat. Iubetur Semiramis venenum ebibere, quod ad ipsam missum credebatur.
SEMIRAMIS VINCTA, PHILINDER ET QUI SUPRA
NIN. Quod sancta poscit aequitas, patrii iubet
Religio iuris, causa perfidiae exigit,
Librate Patres. Paginae tenor prius 1315
Palam legatur. Quisque verborum sonum
Roburque mente ponderet. ARB. Semiramis (Tenor litterarum.)
Unica voluptas, magna pars animi mei,
Accipe sub ista pagina amplexus meos,
Et mille amoris pignora, affectum patris. 1320
Benigna tandem sidera ac mites Dii
Rebus secundos exitus nostris dabunt.
Indicium amoris, grande gemmarum tibi
Tributum Alethes adferet, quas et decor,
Et raritas commendat. Atque utinam meum 1325
Cor inter illas mittere valerem! At tibi
Sint uniones cor patris, quando nihil
Maius paternus mittere affectus potest.
Ampulla ab auro splendida aconitum sinu
Mortale claudit. Utere, ubi casus petit. 1330
Medicina nulla fragere huic vires potest.
Meus tuusque Dorilus vivit tua
Spiratque vita. Numen assistat tibi.
Rex Bactrianus. MEM. Sortis adversae impium
Et execrandum fulmen! O stellae! Mihi 1335
Meri cometae. NIN. Auctoris agnoscis manum?
SEM. Est Bactriani regis. NIN. Istud non negas?
SEM. Id si negarem, laederem fidem meam,
Quam sanctiorem sanguine et vita aestimo.
NIN. Sed ecce gemmas, ecce compositum in neces 1340
Munus, venenum. Munus hoc cui est datum?
SEM. Cui scripta pagina adiacens. NIN. Scripta est tibi.
SEM. Nec nego nec assero. NIN. Non negas; ergo asseris,
Convincerisque criminis. SEM. Nihil nego,
Nihil assero. NIN. Cui toxici ampulla in necem 1345
Est praeparata? SEM. Noverit, qui miscuit.
NIN. Tibi illa Bactris venit, et nescis cui
Sit praeparata? SEM. Nescio. Hoc unum scio
Infame munus ad Semiramidem datum est.
NIN. Non ergo renuis, munus id missum tibi. 1350
SEM. Nec assevero. NIN. Et asseris, et iterum negas.
Ipsa tibi pugnas. SEM. Ah! Satis consto mihi.
Quantumque memetipsa despicio, mea
Tantum patescit candidae mentis fides.
NIN. Iurata nostra in funera patescit fides. 1355
Convinceris, scelesta, et effugium licet,
Vipera, requiras, undique teneris magis.
Quid, Arbaces, ad ista? ARB. Sum mutus. Satis
Loquitur character, munera, ampulla impio
Minax veneno, et perfidam sceleris ream 1360
Condemnat. Ista peste nisi regnum expias,
Tuae aequitati sceleris appingis notam,
Et sancta laedis iura naturae, et tibi
Tuisque certae cladis accersis malum.
NIN. Quid, Farnabaze. FAR. Dubia sibi in animo meo 1365
Fides rebellat. Ego ut Semiramidem tibi
Credam fuisse perfidam? Et flamma et gelu,
Et astra et orcum, et Cynthium et noctis chaos
Prius marita posse coniungi fide
Credam: sed ista signa condemnant ream. 1370
NIN. Osmane, qua tu mente? OSM. Qua leges iubent
Sanctusque iuris ordo. Quod sceptrum gerunt
Potente reges dextera, est fulmen datum
Ut sancta iura protegant. Regnet Ninus,
Sed et aequitatis arbiter iura asserat. 1375
Inpune si sit crimen, extollit caput,
Novoque scelere regis invadit thronum.
Vel ergo sceptrum pone, vel fulmen vibra,
Sententiaque mortis extingue impiam.
NARB. Gravitas patrati criminis et atrox dolus 1380
Claudunt viam clementiae, atque instans tibi
Discrimen omnem mandat abscindi moram.
Dilata poena criminsi vires alit.
Pereat scelesta, regis ut vivat salus.
NIN. Quid ad ista, Memnon? SEM. Loquere; me perimi iube. 1385
Fidelitatis victima in ferrum cadam.
MEM. Et ego ferendam censeo sententiam
Mortis — sed in me. Si Semiramidem ream
Perfidia fecit, Memnonem reum facit,
Et poena utrique debita est. Vel me simul 1390
Ad paria trahe supplicia, vel utrumque exime.
NIN. Quem charta damnat, ille supplicium ferat.
MEM. Me damnat eadem charta, quae uxorem meam
Condemnat. Ambos perime. Sumus ambo rei.
SEM. Quiesce, Memnon. Sanguinis satis mihi 1395
Furoris ut restinguam et invidiae faces.
NIN. Ut aestuantis fraudis extinguas dolum.
MEM. Hunc ego profuso sanguine extinguam dolum.
NIN. Extinguere dolos innocens nescit fides.
SEM. Moriar fidelis, morsque quam subeo 1400
Per saxa sparso sanguine loquetur fidem.
Mori est voluptas, quando pro illaesa fide
Mihi moriendum est:. Unicus mihi est dolor,
Quod innocentem caede sublatam nimis
Sero dolebis. NIN. Perfida, insultas mihi? 1405
Et hoc furore languido et segni feram
Inultus ira? PHIL. Magne Rex, calido strepit
Furore miles, totus huc campo ruit
Mavors relicto, vique captivam petit
Eruere turri. Provide actutum minis,1410
Ne quid cruentus peccet in regem furor.
NIN. Memnon, fidele pectus hic demum exere,
Et quo potentis nectare eloquii vales,
Acerba dulci corda deleni modo
Bilemque prohibe. Regium iuro caput, 1415
Vinclis solutam mox Semiramidem dabo.
MEM. Pietatem adoro regiam, et pronus tibi
Rependo grates. Evolo quo me tuae
Deportat aura gratiae, et fluctum opprimo.
NIN. Habebis illam vinculis etiam suae (Ad partem.) 1420
Vitae solutam. ARB. Tolle cunctantis moras,
Auguste, mentis? Vita momento tua
Dependet isto, et omnis in tuam mora
Vergit ruinam. Perage, quae sero nimis
Neglecta doleas. NIN. Ergo, quod primum licet 1425
Credere tuorum munerum, et gratum magis,
Immerge labris. Ebibe salutem tibi
Et Bactriano Principi. SEM. Hoc munus tua
Accipio dextra, praemium illius manus,
Quae tibi subegit Bactra. Sit fidei meae 1430
Et innocentis mentis hic testis scyphus.
Ego natantem toxico, hoc cyatho mihi
Mortem propino. Sed tibi sero nimis
De me perempta veniet aeternus dolor.
bar
ACTUS III, SCENA vij
Intervenit Dorilus. Manifestat se esse Semiramidem regis Bactriani filiam, ad quam litterae, gemmae, et venenum sunt missa. Liberatur Semiramis. Vinculatur Dorilus.
DORILUS ET QUI SUPER
DOR. Innocua Princeps, abstine immerito labra 1435
Temerare potu: toxicum hoc munus meum
Mihi destinatum. Tollite innocua manu
Fatale virus. SEM. Perfidi et vestro palam
Regi rebelles; tollitis donum, mihi
Quod Rex propinat? DOR. Rex, ego admisi nefas 1440
Quod innocentis morte plectendum iubes.
Meus est reatus, poena sit pariter mea.
NIN. Novae dolosa fraude quaeruntur morae.
SEM. Momento in uno solvere hanc fraudem potes.
Mihi huc venenum redde. DOR. Rex prohibe hoc nefas, 1445
Donec latentem Dorilus aperiat dolum.
NIN. Loquere, sed iterum fraude versuta cave.
Regem implicare. DOR. Ego sum rea, ego Semiramis
Sum Bactriani regis infelix satus.
Ad me venenum, litteras, gemmas Pater 1450
Huc misit. NIN. Audax frontis effrontis scelus,
Mendacia seris. SEM. Me Semiramidem ream
Pagina fatetur: ego, ego sum Semiramis,
Cui missa dona. Redde quod semel mihi,
Rex, destinasti toxicum. DOR. Semiramis 1455
Ego sum, parente rege Bactrorum sata.
NIN. Repente Dorilus in Semiramidem migrat?
Quae somnias mendacia, infamis puer?
DOR. Aurem benignam Dorilo, Auguste, exhibe.
Impulsa postquam Martis incursu 1460
Cecidere Bactra, filium suum pater
Fidelitatis obsidem iussus dare,
Me tibi sororem Dorili et eodem satam
Parente misit, Dorilum ut stirpis suae
Servaret in spem, quoque velatus magis 1465
Dolus lateret, Dorili nomen mihi
Indidit, et artus veste mentita induit.
NIN. Portenta rerum! Falsa nisi rursum occinis.
DOR. Expressa per vim veritas nulli locum
Fraudi relinquit. Litterae et gemmae mihi 1470
Sunt patrii amoris pignus. NIN. At virus? DOR. Mihi est red
Ad reprimendas hostium vires obex.
Si libo tantum, subraho memet malis,
Quaecunque sors adversa moliri potest.
Ergo mihi cyathum porrige. Innocua haec mali est 1475
Scelerisque pura. SEM. Me ream fecit Nini
Prolata iam sententia. Hic scyphus meum
Poscit reatum. DOR. Nullus admissus fuit.
NIN. Et huc et illuc distrahit mentem fides
Suspensa utrinque. Credo, nec credo tamen. 1480
Huc advocetur nuncius, rebus dabit
Hic involutis lumen. At Semiramis,
Cur veritatis abditae arcanum hoc prius
Non prodidisti, crimen ut tantum tuo
Capite amoveres? Quid siles? DOR. Rex, sit mihi 1485
Venia loquendi. Nin. Loquere. DOR. Non binas adhuc
Sol fecit horas, ex quo quis status meus,
Conditio, sexus, patria, quod genus, et pater
Mihi sit, aperui. At vinculo aeterno fidem
Strinxi silendi. Nodus hic vetuit loqui. 1490
SEM. Ah! Cur latentem, Dorile, exsolvis fidem?
Advenit Alethes.
NIN. Dic, Bactriani filia an regis tibi
Est nota Alethes? AL. Nota, cui multus sedet
In fronte Phoebus, plurima in labris Charis,
Venusque in ore ridet, in genis rosa. 1495
NIN. Quod nomen illi est? AL. Est Semiramidis. NIN. Cui
Gemmas tulisti? AL. Dorilo. NIN. Mendax Sinon!
Quam veritati candidae obturas viam,
Tormenta aperient. SEM. Veritas patet. Nihil
Simulare prodest, nisi grave ut capiti tuo 1500
Meoque damnum congreges. Tutus potes,
Quod veritatis testis expressit fides,
Effari, Alethes. Sexus, et genus, et pater
Sunt nota regi. Loquere, quod status hic petit.
AL. Quod ergo patuit, asseram. Semiramis 1505
Est ista, soboles rege Bactrorum sata,
Fratresque nomen sustinet, cuius modos
Moresque, gestus, ora, et aetatem refert.
NIN. Teneatur arcto Dorilus clausus specu,
Dum mente iusta meditor. O Semiramis, 1510
Idaea fidei, candidi exemplum sinus,
Quod Olympus usquam vidit, aut puro dies
Spectavit oculo, mitis errori meo
Concede veniam. Iustus, at nimius tamen,
Peccavit ardor. Quid fides poscat tua 1515
Docebo factis. Ite; pandatur mei
Horti voluptas, quaque se fundit iocis
Amoena Florae gratia, instructis choros
Ludis iuventa ducat, et fidei tuae
Animique testis ludat in plausum dies. 1520