Migne Patrologia Latina Tomus 102
Praefatio (Smaragdus S. Michaelis), J. P. Migne
Praefatio (0013C)
Cernens in Ecclesia plurimos divinarum Scripturarum mysticos sagaciter perquirere sensus, earumque typicos mavelle decerpere fructus, hunc ex multis unum, allegoriarum floribus plenum curavi colligere librum, et de magnorum tractatibus prolatisque sermonibus Patrum, id est Hilarii, Hieronymi, Ambrosii, Augustini, Cypriani, Cyrilli, Gregorii, Victoris, Fulgentii, Joannis Chrysostomi, Cassiodori, Eucherii, Tychonii, Isidori, Figuli, Bedae, Primasii et de caute legendis, Pelagii et Origenis, quasi de magnis fluminibus pelagique gurgitibus in modicos rivulos, pariter derivator, pariterque exstiti breviator. Ut si quis nativa ita vivit pressus ignavia, ut in sacris litteris proprio nequeat sudore quaerere multa, haec a nobis excerpta, unaque compacta saltim ruminare (0013D)non desinet modica. Quia lectionis sacrae cognitio, imbecillis baculum, nervosis arma ministrat. Hostium subdolas fortiter premit insidias, et victoribus aeternas feliciter promittit coronas. Ideo (0014C)veluti ferculum variis deliciis plenum, hunc nos diligenti lectori modicum apponimus librum, ut cum hoc ambrosium palato mentis probaverit gustum, in divinarum Scripturarum se exercens latissimo campo, sagaciter plurimum Domini perquirat eloquium, et velut deificum vivificumque amplectatur animae cibum. Cujus confortatu sedulo, et instanti prudentior, et in futuro saeculo vivat felicior. Et hoc animadvertendum, quia sicut temporibus et diebus convenientes, ita verbis vel actionibus, in hoc Comitis libro , apostolorum vel prophetarum cum Evangeliorum concordantes utiliter positae sunt lectiones. Quarum concordias, opitulante divina gratia, in expositionis evangelicae calce, ubi opportune videro nectere, nectam. Ut quomodo sibi invicem concordi voce lectiones (0014D)respondeant, temporibus, diebus, actionibusque conveniant, diligenter attendens, sine mora solers lector inveniat.