[9] Et illud quoque verum: posteriores leges a «legendo» appellari.
[10] Et primas leges plebiscita fuisse; quia, cum scripto proponi non possent, necessario plebs erat convocanda, ut ore edita ab ordine sciret exempla.
[11] Et ita leges ex sui natura fuisse arcanas, quia solus ordo eas traditione custodiebat.
[12] Et linguam legum solis ex ordine, seu patribus, gnaram: quia plebes externa et incerta lingua loquebantur.
[13] Cumque leges de iure divino maxima ex parte conceptae essent, ex ipso arcano legum arcanas fuisse religiones, et ipsas leges magnam religionis partem fuisse.
[14] Hinc soli poetae «sacri»: vulgus «profanum» erat.
[15] Et sic natura factum ut una res principio fuerit sapientia, sacerdotium et regnum[1].
[16] Et naturam ipsam tulisse ut qui ex ordine essent, apud quos regna heroica primitus fuere, plebem docerent iura.
- ↑ Cfr. Dissertationes, V [Ed.].