72 HISTORIAE ROMANAE
fere millibus peditum, quatuor equitum et centum elephantis adversus Romanos progreditur, qui ultima pernicie fuerunt devicti. M. Regulus cum militibus quingentis vivus in manus hostium venit. Ex omni romano exercitu non amplius duo millia hominum incolumes evaserunt; ex Poenis pauci admodum sunt desiderati. Audito infelicis proelii nuntio, Romani incredibili diligentia fecerunt, ut aestatis initio naves iam trecentas quinquaginta instructas et ornatas haberent; cum quibus in Africam profecti novas sibi victorias terra marique pepererunt. Sed africa regione quaqua versus vastata, cum fames timeretur, Siciliam repeti placuit. Dum revehuntur in Italiam, tantam tempestate cladem sunt perpessi, ut vix octoginta naves servari potuerint, et cadaveribus hominum et fractis navium tabulis, a Camarinensium ora Pachynum usque, litus omne compleretur. In tanto rerum discrimine non leve solatium afflictis Romanis attulit regis Hieronis humanitas, qui benigne exceptos Messanam usque deduxit incolumes.
Carthaginienses a Metello ad Panormum victi. – Regulus Romam missus. – Ipsius fortitudo. – Lutatius consul Poenos vincit ad Aegates insulas. – Finis belli punici primi. – Bellum illyricum. – Galli insubres lusi.
An. ante Chr. n. 248.An. ab urb. cond. 502.
Interea Romani, classe refecta, et conscriptis sociis navalibus, L. Metello imperium prorogarunt, eumque proconsulem bellum in Sicilia administrare iusserunt. Hasdrubal, Carthaginiensium dux,
