Pagina:The poems of Gaius Valerius Catullus - Francis Warre Cornish.djvu/120

104

C. Valeri Catulli Liber

proiciet truncum submisso poplite corpus.  370
 currite ducentes subtegmina, currite, fusi.

quare agite optatos animi coniungite amores.
accipiat coniunx felici foedere divam,
dedatur cupido iamdudum nupta marito.
 currite ducentes subtegmina, currite, fusi.  375

 * * * *
anxia nec mater discordis maesta puellae
secubitu caros mittet sperare nepotes.  380
 currite ducentes subtegmina, currite, fusi.

Talia praefantes quondam felicia †Pelei
carmina divino cecinere *e pectore Parcae.
praesentes namque ante domos invisere castas
heroum et sese mortali ostendere coetu  385
caelicolae nondum spreta pietate solebant.
saepe pater divum templo in fulgente revisens
annua cum festis venissent sacra diebus,
conspexit terra centum procumbere tauros.
saepe vagus Liber Parnasi vertice summo  390
Thyadas effusis euantis crinibus egit,
cum Delphi tota certatim ex urbe ruentes
acciperent laeti divum fumantibus aris.
saepe in letifero belli certamine Mavors
aut rapidi Tritonis era aut Rhamnusia virgo  395
armatas hominumst praesens hortata catervas.
sed postquam tellus scelerest imbuta nefando,
iustitiamque omnes cupida de mente fugarunt,
perfudere manus fraterno sanguine fratres,
destitit extinctos natus lugere parentes,  400
optavit genitor primaevi funera nati,
liber ut innuptae poteretur flore novercae,
ignaro mater substernens se impia nato