18.—Dictator Postumius, postquam cecidisse talem virum, exsules ferociter citato agmine invehi, suos perculsos cedere animadvertit; cohorti suae dat signum, ut quem suorum fugientem viderint, pro hoste habeant. Ita metu ancipiti[1] versi a fuga Romani in hostem, et restituta acies. Cohors dictatoris tum primum proelium iniit: integris corporibus animisque fessos adorti exsules caedunt. Ibi alia inter proceres coorta pugna. Imperator Latinus, ubi cohortem exsulum a dictatore Romano prope circumventam vidit, ex subsidiariis manipulos aliquot in primam aciem secum rapit. Hos agmine venientes T. Herminius legatus conspicatus, interque eos insignem veste armisque Mamilium noscitans, tanta vi cum hostium duce proelium iniit ut et uno ictu occiderit Mamilium, et ipse inter spoliandum corpus hostis veruto percussus, cum victor in castra esset relatus, exspiraverit.
19.—Tum ad equites dictator advolat, obtestans ut, fesso iam pedite, descendant ex equis et pugnam capessant. Dicto paruere: desiliunt ex equis. Recipit extemplo animum pedestris acies, postquam iuventutis proceres aequato genere pugnae secum partem periculi sustinentes vidit. Tum demum impulsi[2] Latini, perculsaque inclinavit[3] acies. Equiti admoti equi, ut persequi hostem posset: secuta et pedestris acies. Ibi nihil nec divinae nec humanae opis dictator praetermittens aedem Castori[4] vovisse fertur: ac pronuntiasse militi praemia, qui primus, qui secundus, castra hostium intrasset: tantusque ardor fuit, ut eodem impetu, quo fuderant hostem, Romani castra caperent. Hoc modo ad lacum Regillum pugnatum est. Narrant etiam veteres Castorem cum fratre opem Romanis tulisse et inter principes pugnam civisse.
- ↑ ancipiti—‘on either side.’
- ↑ impulsi—understand sunt. The auxiliary verb is often omitted.
- ↑ inclinavit—‘wavered.
- ↑ ’Castori—Castor and Pollux, the Dioscuri (sons of Zeus), were twin demigods: the former was celebrated for his horsemanship and the latter for his skill in boxing. They were especially worshipped as the patrons of sailors.
