410numquam hodie tecum commutaturum patrem
unum esse verbum, si te dices ducere.
v Byrria Simo Davos Pamphilvs
BY. Eru’ me relictis rebu’ iussit Pamphilum
hodie observare, ut quid ageret de nuptiis
scirem: id propterea nunc hunc venientem sequor.
415ipsum adeo praesto video cum Davo: hoc agam.
SI. utrumque adesse video. DA. em serva. SI. Pamphile.
DA. quasi de inproviso respice ad eum. PA. ehem pater.
DA. probe. SI. hodie uxorem ducas, ut dixi, volo.
BY. nunc nostrae timeo parti quid hĭc respondeat.
420PA. neque ĭstic neque alibi tibi erit usquam in me mora. BY. hem.
DA. obmutuit. BY. quid dixit? SI. facis ut te decet,
quom istuc quod postulo impetro cum gratia.
DA. sum verus? BY. eru’, quantum audio, uxore excidit.
SI. i nunciam intro, ne in mora, quom opu’ sit, sies.
425PA. eo.—BY. nullane in re esse quoiquam homini fidem!
verum illud verbumst, volgo quod dici solet,
omnis sibi malle melius esse quam alteri.
ego illam vidi: virginem forma bona
memini videri: quo aequior sum Pamphilo,
430si se illam in somnis quam illum amplecti maluit.
renuntiabo, ut pro hoc malo mihi det malum.
vi Davos Simo
DA. Hic nunc me credit aliquam sibi fallaciam
portare et ea me hic restitisse gratia.
