730PY. Chreme. CH. quis est? ehĕm Pythias: vah quanto nunc formonsior
videre mihi quam dudum! PY. certe tuquidem pol multo hilarior.
CH. verbum hercle hoc verum erit “sine Cerere et Libero friget Venus”.
sed Thai’ multŏ ante venit? PY. anne abiit iam a milite?
CH. iamdudum, aetatem. lites factae sunt inter eos maxumae.
735PY. nil dixit tu ut sequerere sese? CH. nil, nisi abiens mi innuit.
PY. eho nonne id sat erat? CH. at nescibam id dicere illam, nisi quia
correxit miles, quod ĭntellexi minu’; nam me extrusit foras.
sed ĕccam ipsam: miror ubi ego huic antevorterim.
viThais Chremes Pythias
TH. Credo equidem illum iam adfuturŭm esse, ut ĭllam [a me] eripiat: sine veniat.
740atqui si illam digito attigerit uno, oculi ilico ecfodientur.
usque adeo ego ĭlli(u)s ferre possum ineptiam et magnifica verba,
verba dum sint; verum enĭm si ad rem conferentur, vapulabit.
CH. Thais, ego iamdudum hic adsum. TH. o mi Chreme, te ipsum exspectabam.
