medii per quod fertur, nempe aëris, est gravissimus; et cum discedat
cum tanta virtute impressa, quanta est sua gravitas, discedit
profecto cum multa virtute impressa, ad quam absumendam non sufficit
motus ex altitudine turris: ex quo fit, ut per spatium unius turris
semper intendatur celeritas. Quod si acciperemus aliquod grave, cuius
gravitas non tam longe aëris gravitatem superaret, tunc profecto
oculis ipsis cerneremus, ipsum, paulo post principium motus, semper
uniformiter moveri, existente tamen aëre tranquillissimo. Et idem
etiam in lapide accidere perspiceremus, si et ex locis altissimis
demitteretur, et ita essemus constituti, ut semper eadem sub ratione
lineam motus perspiceremus. Nanque etiam noster situs impedit,
quominus motus uniformitatem depraehendamus. Fiat enim motus
uniformis ex b in f, et sint bc, cd, de, ef spatia
aequalia; oculus autem aspicientis sit in a, et
ducantur lineae visuales ab, ac, ad, ae, af: et
quia motus ponitur uniformis, et sunt bc, cd,
de, ef spatia aequalia, transibit ergo mobile per
ea in temporibus aequalibus. Tempus ergo
transitus ex b in c erit acquale tempori transitus
ex c in d: motus tamen ex c in d velocior
inspicienti apparebit, cum et spacium cd maius
appareat spacio bc (sub maiori nanque angulo
spectatur). Et ita motus ex d in e velocior
apparebit quam qui ex c in d, cum spacium de maius appareat quam cd,
et aequali in tempore transeatur a mobili: et simili ratione, motus
ex e in f velocior apparebit motu ex d in e. Quare et totus motus bf
difformis apparebit, et semper in fine velocior, cum tamen uniformis
supponatur. Oportet igitur ad diiudicandum motus uniformitatem et
difformitatem, ut spacium sit adeo amplum ut in ipso possit mobile
virtutem resistentem absumere, et ut oculus ita sit dispositus ut ab
angulorum disparitate minime decipiatur.
Do. Satis superque pulcherrima tua explicatio a me percepta est. Itaque circa materiam hanc non nisi unum tantum inquirendum mihi restat; et hoc est utrum credas, an grave quod deorsum demittatur et a movente aliqua vi deiciatur, in motu suo acceleretur sicut et
1. cum descendat discedat – 2, 3. impraessa – 2. gravitas descendit discedit – 7. ipsam – 31. dicipiatur – 35. vi proiciatur deiciatur –
