Pagina:Ioannes Baptista a Vico - Opera latina tomus I - Mediolani, 1835.djvu/34

Haec pagina emendata est

AD

VINCENTIUM GRIMANUM

S. R. E. CARD. AMPLISS.

REGNI NEAPOLITANI

PRO

CAROLO AUSTRIO

MODERATOREM

Quum sacri juris sit, Vincenti Grimane Card. ampliss., res haud consecratas haberi, quae non sunt rite per Pontifices dedicatae: quumque Regia haec Regni Neapol. Academia Studiorum hujus anni inauspicationem Carolo III Austrio Hispaniarum, nostroque potentissimo Regi vovisset; et religio esset, tanquam profanos adire Principem, qui et sua Regis vi sacer, et Regiarum virtutum, quae eum exornant, divinis prope honoribus dignus est; diligentissimis tecum precibus egit, ut qui cum nostra omnium felicitate in hoc Regno moderando tanti Regis sacra, justitiam, fidem, concordiamque tueris; tua praesentia at auctoritate hoc votum suum quamsolemnissime exolverent. Existimesti tuum haec castissima sapientiae desideria rata facere; quando in ea Republica natus es, quae sapientissimis institutis fundata, cum omnes Orbis terrarum omnis memoriae Respublicas aequabili statu imperii devicisset, temporum aeternitati videtur condita: iis majoribus ortus, qui talem tantamque Rempublicam sapientissimis consiliis domi, militiaeque illustrarunt: ea demum sapientia praeditus, ut tua unius mens ingentes valeat exercitus, quo debita Carolo regna paret; universos Senatus, quo parta conservet. Esset modo, ut tibi tantae dignationis gratias cum tuis laudibus admixtas ageremus; sed grates dignae tua ipsius aeterna sunt benefacta: et tunc te pro dignitate laudari existimas, cum quisque nostrum, te moderatore, suum sedulo obeat munus. Itaque quando per tuam sapientiam licet, ad hos sapientiae novitios Orationem convertam.