Sed satis, ut puto, iam narravi. Vos, discipuli, mihi respondete de insula roganti. Ubi est casa sagae? Tu, Sexte, responde. Incipe, parve puer.
Magister multa interrogat.
Caput 12. Cursus maritimus.
Pater. Tite, Tite, surge. Sex iam dies cubas.
Titus. At, mi pater, surgere non possum. Primo huius cursus die aegrotavi, et secundo, et tertio, et quarto, et quinto, et sexto; adhuc nausea laboro.
Pater. Nugas! Minus iam tumidis aestuat mare fluctibus, et portui cuidam appropinquamus.
Titus. Non nugas, sed vera dico. Ecce, tremunt manus, tremunt genua. Stare non possum.
Pater. Itane? Nonne me fallis? Fortasse vera dicis, nam pallidus es visu, et voltus tui species mihi displicet. Sed si in lectulo quiesces, noli tempus perdere. Orbilius ipse hanc navem heri ascendit, qui te res aliquot grammaticas docebit. Ego eum iam vocabo. Nondum enim didicisti:
portus, portum, portus, portui, portu, portus, portus, portuum, portibus, portibus.
res, rem, rei, rei, re, res, res, rerum, rebus, rebus.
