Salutator. Gratias tibi ago, optime patrone. Vale. [Sportulam accipit, et per vestibulum exit: dum in via stat sportulam inspicit.] Multum inest. Ecce, caulem video, duo ova, aliquantulum panis. Cauli fortasse non ita viridis est color; lapidosus est panis... Sed carnem olfacio. [Bibulam extrahit.] O nasum meum! [Nasum digitis comprimit.] Odor abominandus est! Abominandus patronus, ianitor abominandus! [Ianitorem vocat.] Heus tu! iterum pande fores.
Ianitor. Quid, malum, clamas? Domino meo, bono civi, patrono optimo maledicis?
Salutator. Bubulam specta, vel nasum potius adhibe.
Ianitor. [Bubulam olfacit.] Bene olet caro. Nasi, non carnis, est culpa.
Salutator. Si ita tibi placet, tibi licet habere. Tu, qui ostium pandis, pande os et admitte bubulam. Nonne bene olet? Nonne bene sapit? Es totam. Quid ita respuis? Admitte iterum. Dominus tuus, bonus civis, optimus patronus, optimam habet bubulam. Sed tu disce proverbium:
"Magna est veritas et praevalet." Vale.
Exercitationes.
1. Quid salutator facere volt?
2. Quid re vera petunt salutatores?
3. Ubi epistulas scribit patronus?
4. Quota hora adest salutator?
5. Ubi sunt sportulae?
6. Cur patronus gratias agit salutatori?
7. Quid continet sportula?
8. Quid in sportula olfacit salutator?
9. Qualis panis in sportula est?
10. Cur bubulam respuit ianitor?
