Pagina:Hortus Malabaricus Volume 1.pdf/21

Haec pagina emendata est
2
HORTUS

Rami foliacei simplices sunt, in nullos alios divisi, in pede quo caudicem primum arctè complectuntur interius plani, ac nonnihil concavi ac supernè interiùs in ventrem acutum extenuati, exterius in totum convexi, in imâ parte pedis latiores & inde sensim in angustum contracti ac in oris extenuati, & reticulato, raro, ruffofusco cortice, cujus filamenta ex oris pedis utrinque prodeunt caudicem primum circumvestientes ac se mutuo obtegentes; suntque vestiti cortice flavo viridi ac intus filamentis lignosis minus duris mollem inter carnem albicantem pertextis constantes: qui vetustiores sunt à caudice magis deflectunt ac pandi sunt, dein decidunt alter post alterum temporibus ordinatis, dum alii ex summitate caudicis de novo erumpunt.

Folia, quas superiorem partem ramorum circumvestiunt ad partem eorum planam ubi in ventrem extenuati sunt, utrinque in oris prodeunt obliquè ex adverso sita, suntque oblongo-angusta longitudine plus minus sesquicubiti, latitudine trium transversorum digitorum ab origine sensim in angustum contracta, superficie valde plana, venis parallelis ac subtilibus in longum striata inferiùs cum futura albicante subflava quæ in angulum inflexa est, inserta sunt, ac versus exteriorem partem ex angulo futuræ nonnihil clausa, & in interīori, quæ cum interiori superficie rami convenit, costa altè eminente, quæ exteriorem partem sulco striat, in medio obsita, viroris fusci & nitentis, cùm marcescunt, flavescente, saporis & odoris nullius nisi sylvestris.

Fig.2.

Supra ex Ramorum Foliaceorum exortu ex Caudice oriuntur Capsæ oblongæ in quibus Flores & Fructus teneri simul inclusi sunt furculis insidentes; sunt autem capsæ rotundæ & nonnihil planæ tres quatuorve spithamas longæ, ad originem angustiores & flaviores, & in vertice in conum stricti medii digiti latitudine ferme in cortice crassæ venis filamentisque lignosis in longum striatæ, exterius virides ac sulcis lirisque quæ ad cacumen profundiores, exaratæ, interius albicantes & glabræ.

Surculi Fructiferi dum in capsa inclusi sunt glabri & nitentes ad originem glandulosi, angulati & undulantibus lacunis inflexi, alii rectiùs, alii ductu parùm serpentino excurrentes medio ramo crassiori coronatim circumpositi, & versus cuspidem capsæ in angustum contracti, denso ordine ad se mutuo arcte confiti ac rupta capsa ex medio ramo se transversim in orbem expandunt, suntque vestiti cortice crassiolo, primum cum molles ac teneri & in capsa inclusi subflavi & flavo-albescentes ac dein magis flavescentes ac rubescentes, post viridescentes; in hisce Surculis in Capsa Flores & Fructus ex ordīne proveniunt, ut Fructus in inferioribus partibus prodeant quam Gemmæ Florum.

Gem-