CARMEN XXXIV.
AD DEORUM CULTUM REDITUS.
Parcus deorum cultor et infrequens,
Insanientis dum sapientiæ Consultus erro, nunc retrorsum Vela dare atque iterare cursus
Cogor relictos : namque Diespiter, 5
Igni corusco nubila dividens Plerumque, per purum tonantes Egit equos volucremque currum ;
Quo bruta tellus et vaga flumina,
Quo Styx et invisi horrida Tænari 10 Sedes Atlanteusque finis Concutitur. Valet ima summis
Mutare, et insignem attenuat deus,
Obscura promens ; hinc apicem rapax Fortuna cum stridore acuto 15 Sustulit, hic posuisse gaudet.
|