Haec pagina emendata est
Si proprium est, quod quis libra mercatus et ære est,
(Quædam, si credis consultis, mancipat usus) ;
Qui te pascit ager, tuus est ; et vilicus Orbi,
Cum segetes occat tibi mox frumenta daturas,
Te dominum sentit. Das nummos ; accipis uvam,
Pullos, ova, cadum temeti. Nempe modo isto
Paulatim mercaris agrum, fortasse trecentis,
Aut etiam supra, nummorum milibus emptum.
Quid refert, vivas numerato nuper, an olim ?
Emptor Aricini quondam, Veientis et arvi,
Emptum cœnat olus, quamvis aliter putat ; emptis
Sub noctem gelidam lignis calefactat ænum,
Sed vocat usque suum, qua populus adsita certis
Limitibus vicina refugit jurgia ; tamquam
Sit proprium quidquam, puncto quod mobilis horæ,
Nunc prece, nunc pretio, nunc vi, nunc sorte suprema
