Haec pagina emendata est
Cum pulchris tunicis sumet noua consilia et spes ;
Dormiet in lucem ; scorto postponet honestum
Officium ; nummos alienos pascet ; ad imum
Thrax erit, aut olitoris aget mercede caballum.
Arcanum neque tu scrutaberis illius unquam,
Commissumque teges et vino tortus et ira.
Nec tua laudabis studia, aut aliena reprendes ;
Nec, cum venari volet ille, poemata panges.
Gratia sic fratrum geminorum Amphionis atque
Zethi dissiluit, donec suspecta severo
Conticuit lyra. Fraternis cessisse putatur
Moribus Amphion ; tu cede potentis amici
Lenibus imperiis, quotiesque educet in agros
Ætolis onerata plagis jumenta canesque,
Surge, et inhumanæ senium depone Camenæ,
Cænes ut pariter pulmenta laboribus empta.
