Pagina:Horace - Œuvres, trad. Leconte de Lisle, II.djvu/207

Haec pagina emendata est


Meque et te : nam quæ deserta et inhospita tesqua
Credis, amœna vocat, mecum qui sentit ; et odit
Quæ te pulchra putas. Fornix tibi, et uncta popina
Incutiunt urbis desiderium, video ; et quod
Angulus iste feret piper et thus ocius uva ;
Nec vicina subest vinum præbere taberna
Quæ possit tibi ; nec meretrix tibicina, cujus
Ad strepitum salias terræ gravis ; et tamen urges
Jampridem non tacta ligonibus arva, bovemque
Disjunctum curas et strictis frondibus exples.
Addit opus pigro rivus, si decidit imber,
Multa mole docendus aprico parcere prato.
Nunc age, quid nostrum concentum dividat, audi.
Quem tenues decuere togæ nitidique capilli,
Quem scis immunem Cinaræ placuisse rapaci,
Quem bibulum liquidi media de luce Falerni,