Haec pagina emendata est
Exilis domus est, ubi non et multa supersunt,
Et dominum fallunt, et prosunt furibus. Ergo
Si res sola potest facere et servare beatum,
Hoc primus repetas opus, hoc postremus omittas.
Si fortunatum species et gratia præstat,
Mercemur seruum, qui dictet nomina, lævum
Qui fodicet latus, et cogat trans pondera dextram
Porrigere : « Hic multum in Fabia valet, ille Velina ;
Cui libet his fasces dabit, eripietque curule,
Cui volet, inportunus ebur. Frater, Pater adde ;
Ut cuique est ætas, ita quemque facetus adopta. »
Si bene qui cœnat, bene vivit ; lucet, eamus,
Quo ducit gula ; piscemur, venemur, ut olim
Gargilius, qui mane plagas, venabula, servos
Differtum transire Forum populumque jubebat,
