Incipiam, patiarque vel inconsultus haberi.
Quid non ebrietas designat ? Operta recludit,
Spes jubet esse ratas, in prœlia trudit inertem,
Sollicitis animis onus eximit, addocet artes.
Fœcundi calices quem non fecere disertum ?
Contracta quem non in parpertate solutum ?
Hæc ego procurare et idoneus imperor, et non
Invitus, ne turpe toral, ne sordida mappa
Corruget nares, ne non et cantharus et lanx
Ostendat tibi te ; ne fidos inter amicos
Sit qui dicta foras eliminet ; ut coeat par
Jungaturque pari. Butram tibi, Septiciumque,
Et nisi cœna prior, potiorque puella Sabinum
Detinet, assumam. Locus est et pluribus umbris ;
Sed nimis arcta premunt olidæ convivia capræ.
Tu quotus esse velis, rescribe, et rebus omissis,
Atria servantem postico falle clientem.
