Haec pagina emendata est
Est mihi purgatum crebro qui personet aurem :
« Solve senescentem mature sanus equum, ne
Peccet ad extremum ridendus, et ilia ducat. »
Nunc itaque et versus, et cetera ludicra pono.
Quid verum atque decens curo et rogo, et omnis in hoc sum ;
Condo et compono quæ mox depromere possim.
Ac ne forte roges, quo me duce, quo Lare tuter ;
Nullius addictus jurare in verba magistri,
Quo me cumque rapit tempestas, deferor hospes.
Nunc agilis fio, et mersor civilibus undis,
Virtutis veræ custos rigidusque satelles ;
Nunc in Aristippi furtim præcepta relabor ;
Et mihi res, non me rebus subjungere conor.
Ut nox longa quibus mentitur amica, diesque
Longa videtur opus debentibus ; ut piger annus
Pupillis, quos dura premit custodia matrum ;
