Haec pagina emendata est
Te semper anteit sæva Necessitas,
Clavos trabalis et cuneos manu
Gestans æna ; nec severus
Uncus abest, liquidumque plumbum.
Te Spes, et albo rara Fides colit
Velata panno, nec comitem abnegat,
Utcumque mutata potentes
Veste domos inimica linquis.
At vulgus infidum, et meretrix retro
Perjura cedit : diffugiunt cadis
Cum fæce siccatis amici,
Ferre jugum pariter dolosi.
Serves iturum Cæsarem in ultimos
Orbis Britannos et juvenum recens
Examen Eois timendum
Partibus, Oceanoque rubro.
Eheu ! cicatricum et sceleris pudet,
Fratrumque. Quid nos dura refugimus
