Pagina:Horace - Œuvres, trad. Leconte de Lisle, I.djvu/27

Haec pagina emendata est



Tentaris numeros. Ut melius, quidquid erit, pati !
Seu pluris hiemes, seu tribuit Jupiter ultimam,
Quæ nunc oppositis debilitat pumicibus mare
Tyrrhenum, sapias, vina liques, et spatio brevi
Spem longam reseces. Dum loquimur, fugerit invida
Ætas. Carpe diem, quam minimum credula postero.



AD AUGUSTUM


Quem virum, aut heroa, lyra vel acri
Tibia sumes celebrare, Clio ?
Quem Deum ? cujus recinet jocosa
          Nomen imago,
Aut in umbrosis Heliconis oris,
Aut super Pindo, gelidove in Hæmo ?
Unde vocalem temere insecutæ
          Orphea silvæ,