Pagina:Horace - Œuvres, trad. Leconte de Lisle, I.djvu/259

Haec pagina emendata est



 
Scribendi recte sapere est et principium et fons,
Rem tibi Socraticæ poterunt ostendere chartæ ;
Verbaque provisam rem non invita sequentur.
Qui didicit, patriæ quid debeat et quid amicis ;
Quo sit amore parens, quo frater amandus, et hospes ;
Quod sit conscripti, quod judicis officium ; quæ
Partes in bellum missi ducis ; ille profecto
Reddere personæ scit convenientia cuique.
Respicere exemplar vitæ morumque jubebo
Doctum imitatorem et vivas hinc ducere voces.
Interdum speciosa locis, morataque recte
Fabula, nullius veneris, sine pondere et arte,
Valdius oblectat populum, meliusque moratur,
Quam versus inopes rerum nugæque canoræ.
Graiis ingenium, Graiis dedit ore rotundo
Musa loqui, præter laudem nullius avaris ;
Romani pueri longis rationibus assem