Haec pagina emendata est
Citumque retro solve, solve turbinem.
Movit nepotem Telephus Nereium,
In quem superbus ordinarat agmina
Mysorum, et in quem tela acuta torserat.
Unxere matres Iliæ additum feris
Alitibus atque canibus homicidam Hectorem,
Postquam relictis mœnibus rex procidit,
Heu ! pervicacis ad pedes Achillei.
Sætosa duris exuere pellibus
Laboriosi remiges Ulixei
Volente Circe, membra ; tunc mens et sonus
Relapsus atque notus in vultus honor.
Dedi satis superque pœnarum tibi,
Amata nautis multum et institoribus.
Fugit juventas et verecundus color
Reliquit ossa pelle amicta lurida ;
Tuis capillus albus est odoribus ;
Nullum a labore me reclinat otium ;
