Haec pagina emendata est
Tutus bos etenim rura perambulat ;
Nutrit rura Ceres almaque Faustitas ;
Pacatum volitant per mare navitæ ;
Culpari metuit fides ;
Nullis polluitur casta domus stupris ;
Mos et lex maculosum edomuit nefas ;
Laudantur simili prole puerperæ ;
Culpam pœna premit comes.
Quis Parthum paveat, quis gelidum Scythen ?
Quis, Germania quos horrida parturit,
Fœtus incolumi Cæsare ? quis feræ
Bellum curet Iberiæ ?
Condit quisque diem collibus in suis,
Et vitem viduas ducit ad arbores ;
Hinc ad vina redit lætus et alteris
Te mensis adhibet Deum ;
Te multa prece, te prosequitur mero
