Pagina:Horace - Œuvres, trad. Leconte de Lisle, I.djvu/174

Haec pagina emendata est



AD AUGUSTUM.


Divis orte bonis, optume Romulæ
Custos gentis, abes jam nimium diu ;
Maturum reditum pollicitus Patrum
          Sancto concilio, redi.
Lucem redde tuæ, dux bone, patriæ :
Instar veris enim voltus ubi tuus
Affulsit populo, gratior it dies,
          Et soles melius nitent.
Ut mater juvenem, quem Notus invido
Flatu Carpathii trans maris æquora
Cunctantem spatio longius annuo
          Dulci distinet a domo,
Votis ominibusque et precibus vocat,
Curvo nec faciem litore dimovet :
Sic desideriis icta fidelibus
          Quærit patria Cæsarem.