Haec pagina emendata est
Junctis visit oloribus :
Dicetur, merita Nox quoque nænia.
Tyrrhena regum progenies, tibi
Non ante verso lene merum cado
Cum flore, Mæcenas, rosarum, et
Pressa tuis balanus capillis
Jamdudum apud me est. Eripe te moræ :
Ne semper udum Tibur, et Æsulæ
Declive contempleris arvum, et
Telegoni juga parricidæ.
Fastidiosam desere copiam, et
Molem propinquam nubibus arduis,
Omitte mirari beatæ
Fumum et opes strepitumque Romæ.
