Haec pagina emendata est
Nil mortale loquar. Dulce periculum est,
O Lenæe, sequi Deum
Cingentem viridi tempora pampino.
Vixi puellis nuper idoneus,
Et militavi non sine gloria ;
Nunc arma, defunctumque bello
Barbiton hic paries habebit,
Lævum marinæ qui Veneris latus
Custodit. Hic, hic ponite lucida
Funalia, et vectis et arcus
Oppositis foribus minaces,
O quæ beatam Diva tenes Cyprum, et
Memphim carentem Sithonia nive,
Regina, sublimi flagello
Tange Chloen semel arrogantem.
