Pagina:Horace - Œuvres, trad. Leconte de Lisle, I.djvu/149

Haec pagina emendata est



Virtutisque viam deserit arduæ ?
          Vel nos in Capitolium,
Quo clamor vocat, et turba faventium ;
          Vel nos in mare proximum
Gemmas, et lapides aurum et inutile,
          Summi materiem mali,
Mittamus. Scelerum si bene pænitet.
          Eradenda cupidinis
Pravi sunt elementa, et teneræ nimis
          Mentes asperioribus
Formandæ studiis. Nescit equo rudis
          Hærere ingenuus puer,
Venarique timet ; ludere doctior,
          Seu Græco jubeas trocho,
Seu malis vetita legibus alea,
          Cum perjura patris fides
Consortem socium fallat et hospitem,
          Indignoque pecuniam
Hæredi properet. Scilicet inprobæ
          Crescunt divitiæ ; tamen
Curtæ nescio quid semper abest rei.