Haec pagina emendata est
Miserarum est, neque amori dare ludum, neque dulci
Mala vino lavere, aut exanimari, metuentes
Patruæ verbera linguæ.
Tibi qualum Cythereæ puer ales, tibi telas,
Operosæque Minervæ studium aufert, Neobule,
Liparæi nitor Hebri,
Simul unctos Tiberinis humeros lavit in undis,
Eques ipso melior Bellerophonte, neque pugno,
Neque segni pede victus ;
Catus idem per apertum fugientis agitato
Grege cervos jaculari, et celer arto latitantem
Fruticeto excipere aprum.
