Hoc genere strategematon[87] ea tantum parte utendum est, qua imperitos existimabimus esse, apud quos bis utemur; sed multo magis ea, quæ talia erunt, excogitabuntur, ut a diis monstrata credantur.
14. Alexander Macedo sacrificaturus[88] inscripsit medicamento haruspicis manum, quam ille extis erat suppositurus. Litteræ significabant, victoriam Alexandro dari: quas quum jecur calidum rapuisset, et a rege militi esset ostensum, auxit animum, tanquam deo spondente victoriam.
15. Idem fecit Sudines haruspex, prœlium Eumene[89] cum Gallis commissuro.
16. Epaminondas Thebanus, ad versus Lacedæmonios fiduciam suorum religione adjuvandam ratus, arma, quæ ornamentis affixa in templis erant, nocte subtraxit[90], persuasitque militibus, deos iter suum sequi, ut prœliantibus ipsis adessent.
17. Agesilaus Lacedæmonius, quum quosdam Persarum cepisset[91], quorum habitus multum terroris præfert, quoties veste tegitur, nudatos militibus suis, ut alba corpora et umbratica contemnerent, ostendit.
18. Gelo, Syracusanorum tyrannus, bello adversus Pœnos suscepto, quum multos cepisset, infirmissimum quemque præcipue ex auxiliaribus, qui nigerrimi erant, nudatum in conspectu suorum produxit, ut persuaderet contemnendos.
19. Cyrus, rex Persarum, ut concitaret animos[92] popularium, tota die in excidenda quadam silva eos
