Pagina:Frontin - Les Stratagèmes - Aqueducs de la ville de Rome, trad Bailly, 1848.djvu/86

Haec pagina emendata est
84
STRATEGEMATICON LIB. I.

9. Archidamus Lacedæmonius, adversus Arcadas bellum gerens, arma[83] in castris statuit, et circa ea duci equos noctu clam imperavit: quorum vestigia mane, tanquam Castor et Pollux perequitassent, ostendens, adfuturos eosdem ipsis prœliantibus persuasit.

10. Pericles, dux Atheniensium, initurus prœlium, quum animadvertisset lucum, ex quo utraque acies conspici poterat, densissimæ opacitatis, vastum alioquin et Diti patri sacrum, ingentis illic staturæ hominem, altissimis cothurnis, et veste purpurea, ac coma venerabilem, in curru candidorum equorum sublimem constituit, qui, dato signo pugnæ, proveheretur, et voce Periclen nomine appellans, cohortaretur eum, diceretque, deos Atheniensibus adesse. Quo pæne ante conjectum teli hostes terga verterunt.

11. L. Sulla, quo paratiorem militem ad pugnandum haberet, prædici sibi a diis futura simulavit. Postremo etiam in conspectu exercitus, priusquam in aciem descenderet, signum modicæ amplitudinis, quod Delphis sustulerat[84], orabat petebatque promissam victoriam maturaret.

12. C. Marius sagam quamdam ex Syria habuit[85], a qua se dimicationum eventus prædiscere simulabat.

13. Q. Sertorius, quum barbaro et rationis indocili milite uteretur, cervam candidam[86] insignis formæ per Lusitaniam ducebat, et ab ea, quæ agenda aut vitanda essent, prænoscere se asseverabat, ut barbari ad omnia, tanquam divinitus imperata, obedirent.