Pagina:Frontin - Les Stratagèmes - Aqueducs de la ville de Rome, trad Bailly, 1848.djvu/70

Haec pagina emendata est
68
STRATEGEMATICON LIB. I.

6. Spartaco, copiisque ejus, scuta ex vimine[61] fuerunt, quæ coriis tegebantur.

7. Non alienus, ut arbitror, hic locus est, referendi factum Alexandri[62] Macedonis illud nobile, qui per deserta Africæ itinera, gravissima siti cum exercitu affectus, oblatam sibi a milite in galea aquam, spectantibus universis, effudit; utilior exemplo temperantiæ, quam si communicare potuisset.


VIII. De distringendis hostibus[63].

1. Coriolanus[64], quum ignominiam damnationis suæ bello ulcisceretur, populationem patriciorum agrorum inhibuit, deustis vastatisque plebeiorum, ut discordiam moveret, qua consensus Romanorum distringeretur.

2. Hannibal Fabium, cui neque virtute, neque artibus bellandi par erat, ut infamia destringeret, agris ejus abstinuit, ceteros populatus. Contra ille, ne suspecta civibus fides esset, magnitudine animi effecit, publicatis possessionibus suis[65].

3. Q. Fabius Maximus quinto consul, quum Gallorum, Umbrorum, Hetruscorum, Samnitiumque adversus populum Romanum exercitus coissent, contra quos et ipse trans Apenninum in Sentinate castra communiebat, scripsit Fulvio et Postumio, qui in præsidio urbi erant, copias ad Clusium[66] moverent. Quibus assequutis, ad sua defendenda Hetrusci Umbrique descenderunt. Re-