Pagina:Frontin - Les Stratagèmes - Aqueducs de la ville de Rome, trad Bailly, 1848.djvu/64

Haec pagina emendata est
62
STRATEGEMATICON LIB. I.

in illos conversa, parte exercitus terga eorum cecidit, parte castra fecit[53].

25. Darius, ut falleret Scythas discessu, canes atque asinos in castris reliquit[54]: quos quum latrantes rudentesque hostis audiret, remanere Darium credidit.

26. Eumdem errorem objecturi nostris Ligures, per diversa loca buculos laqueis ad arbores alligaverunt, qui diducti frequentiori mugitu speciem remanentium præbebant hostium.

27. Hanno , ab hostibus clausus, locum eruptioni maxime aptum, aggestis levibus materiis incendit; tum hoste ad ceteros exitus custodiendos avocato, milites per ipsam flammam eduxit, admonitos ora scutis, crura veste contegere.

28. Hannibal, ut iniquitatem locorum, et inopiam, instante Fabio Maximo, effugeret, noctu boves, cuibus ad cornua fasciculos alligaverat sarmentorum[55] subjecto igne, dimisit; quumque ipso motu adolescente flamma turbaretur pecus, magna discursatione montes, in quos actum erat, collustravit. Romani, qui ad speculandum concurrerant, primo prodigium opinati sunt; deinde, quum certa Fabio renuntiassent, ille de insidiarum metu suos castris continuit: barbari, obsistente nullo, profecti sunt.