Pagina:Frontin - Les Stratagèmes - Aqueducs de la ville de Rome, trad Bailly, 1848.djvu/48

Haec pagina emendata est
46
STRATEGEMATICON LIB. I.

ibidem militum parte subsistere, ex qua, quum Armenii ad inferioris vadi tutelam rediissent, per superius transgrederetur. Armenii credentes, decursuros omnes, decepti sunt a remanentibus. Hi quum, resistente nullo, vadum superassent, transeuntium suorum fuere propugnatores.

11. Ap. Claudius consul primo bello Punico, quum a Rhegio Messanam trajicere militem nequiret, custodientibus fretum Pœnis, sparsit rumorem, quasi bellum injussu populi inceptum gerere non posset, classemque in Italiam versus se agere simulavit. Digressis deinde Pœnis, qui profectioni ejus habuerant fidem, circumactas naves appulit Siciliæ.

12. Lacedæmoniorum duces[34], quum Syracusas navigare destinassent, et Pœnorum dispositam penitus classem timerent, decem Punicas naves, quas captivas habebant, veluti victrices, primas jusserunt agi, aut a latere junctis, aut puppe religatis aliis. Qua specie deceptis Pœnis, transierunt.

13. Philippus, quum angustias maris, quæ Cyaneæ[35] appellantur, transnavigare propter Atheniensium classem, quæ opportunitatem loci custodiebat, non posset, scripsit Antipatro, Thraciam rebellare, præsidiis, quæ ibi reliquerat, interceptis, ut sequeretur omnibus omissis: quæ epistolæ ut interciperentur ab hoste curavit Athenienses arcana Macedonum excepisse visi, classem abduxerunt. Philippus, nullo prohibente, angustias freti liberavit.