Pagina:Frontin - Les Stratagèmes - Aqueducs de la ville de Rome, trad Bailly, 1848.djvu/304

Haec pagina emendata est
302
STRATEGEMATICON LIB. IV.

eos, et sua fide[88], et ipsorum metu exsolutos, recepit.

25. Hannibal post prœlium, quo ingentem cladem ad Thrasymenum Romani acceperunt, quum sex millia hostium, interposita pactione, in potestatem suam redegisset, socios Latini nominis benigne in civitates suas dimisit, dictitans, se Italiæ liberandæ causa bellum gerere[89]: eorumque opera aliquot populos in deditionem accepit.

26. Mago, quum Locri obsiderentur a Crispino[90], classis nostræ præfecto, diffudit ad Romana castra rumorem, Hannibalem, cæso Marcello, ad liberandos obsidione Locros venire: clam deinde equites emissos jussit a montibus, qui in conspectu erant, se ostendere. Quo facto effecit ut Crispinus, Hannibalem adesse ratus, conscenderet naves, ac fugeret.

27. Scipio Æmilianus, ad Numantiam, omnibus non cohortibus tantum, sed centuriis sagittarios et funditores interposuit[91].

28. Pelopidas Thebanus, quum a Thessalis in fugam versus, flumen, in quo tumultuarium fecerat pontem, liberasset, ne sequentibus hostibus idem transitus maneret, novissimo agmini præcepit, incenderent pontem.

29. Romani, quum Campanis equitibus nullo modo pares essent, Q. Nævius, centurio in exercitu Fulvii Flacci proconsulis, excogitavit, ut delectos ex toto exercitu, qui velocissimi videbantur, et mediocris erant staturæ, parmulis non amplis, et galericulis gladiisque,