16. Scipio Africanus dicere solitus est, hosti non solum dandam esse viam fugiendi, sed etiam muniendam[79].
17. Paches Atheniensis affirmavit, incolumes futuros hostes, si deponerent ferrum: ejusque obsequutos conditionibus, universos, qui in sagulis ferreas fibulas habuissent[80], interfici jussit.
18. Hasdrubal, subigendorum Numidarum causa ingressus fines eorum, resistere parantibus affirmavit, ad capiendos se venisse elephantos, quibus ferax est Numidia[81]. Ut hoc permitterent, poscentibus securitatem promisit; et ea persuasione avocatos adortus, sub leges redegit.
19. Alcetas Lacedæmonius, ut Thebanorum commeatum facilius ex inopinato aggrederetur, in occulto paratis navibus, tanquam unam omnino haberet triremem, vicibus in ea remigem exercebat: quodam deinde tempore omnes naves in Thebanos transnavigantes immisit, et commeatibus eorum potitus est[82].
20. Ptolemæus adversus Perdiccam[83], exercitu prævalentem, ipse invalidus, omne pecudum genus, religatis a tergo, quæ traherent, sarmentis, agendum per paucos curavit equites: ipse prægressus cum copiis, quas habebat, effecit ut pulvis, quem pecora excitaverant, speciem magni sequentis exercitus moveret, cujus exspectatione territum vicit hostem.
21. Myronides[84] Atheniensis adversus Thebanos,
