quumque conspexisset quemdam prope exanimatum frigore, considere loco suo jussit, dixitque ei: « Si in Persis natus esses, in regia sella resedisse tibi capital foret; in Macedonia nato conceditur[66]. »
4. Divus Augustus Vespasianus, quum quemdam adolescentem, honeste natum, militiæ inhabilem, augustiarum rei familiaris causa eductum ad longiorem ordinem[67] rescisset, censu constituto, honesta missione exauctoravit.
1. Cæsar dicebat, idem sibi esse consilium adversus hostem, quod plerisque medicis contra vitia corporum, fame potius quam ferro[68] superandi.
2. Domitius Corbulo dolabra, id est operibus[69], hostem vincendum esse dicebat.
3. L. Paullus imperatorem, senem moribus dicebat esse oportere: significans, moderatiora sequenda consilia[70].
4. Scipio Africanus fertur dixisse, quum eum quidam parum pugnacem dicerent, « Imperatorem me mater, non bellatorem, peperit. »
5. C. Marius Teutono provocanti eum, et postulanti, ut prodiret, respondit, si cupidus mortis esset, laqueo eum vitam posse finire[71]. Quum deinde instaret, gladiatorem contemptæ staturæ et prope exactæ ætatis objecit ei, dixitque, si eum superasset, cum victore congressurum.