21. Cyzicum quum oppugnaret Mithridates, captivos ejus urbis produxit, ostenditque obsessis, arbitratus futurum, ut miseratione suorum compelleret ad deditionem oppidanos. At illi cohortati ad patiendum fortiter mortem captivos, servare Romanis fidem perseveraverunt.
22. Segovienses, quum a Viriatho liberi et conjuges cæderentur, præoptaverunt spectare supplicia pignorum suorum, quam ab Romanis deficere.
23. Numantini, ne se dederent, fame mori, præfixis foribus domuum[63] suarum, maluerunt.
1. Q. Fabius, hortante filio, ut locum idoneum paucorum jactura caperet, « Visne, inquit, tu ex illis paucis esse[64]? »
2. Xenophon, quum equo veheretur, et pedites jugum quoddam occupare jussisset, unusque ex eis obmurmurando diceret, facile tam laboriosa sedentem imperare, desiluit, et gregalem equo imposuit, cursu ipse pedestri ad destinatum jugum contendens. Cujus facti ruborem quum perpeti miles non posset, irridentibus commilitonibus, sponte descendit. Xenophontem vix universi perpulerunt, ut conscenderet equum, et laborem suum in necessaria duci munera reservaret[65].
3. Alexander, quum hieme duceret exercitum, residens ad ignem, recognoscere prætereuntes copias cœpit;
