Pagina:Frontin - Les Stratagèmes - Aqueducs de la ville de Rome, trad Bailly, 1848.djvu/288

Haec pagina emendata est
286
STRATEGEMATICON LIB. IV.

lites: quos hortatus, ut virtute sua exercitum servarent, in mediam vallem decucurrit. Ad opprimendos eos undique descendit hostis, longoque et aspero prœlio retentus, occasionem consuli ad extrahendum exercitum dedit.

11. C. Cæsar adversus Germanos et regem Ariovistum pugnaturus, confusis suorum animis, pro concione dixit, nullius se eo die opera, nisi decimæ legionis, usurum: quo assequutus est, ut et decimani, tanquam præcipuæ fortitudinis testimonio, concitarentur, et ceteri pudore, ne penes alios gloria virtutis esset.

12. Lacedæmonius quidam nobilis, Philippo denuntiante, multa se prohibiturum, nisi civitas sibi traderetur, « Num, inquit, et pro patria mori nos prohibebit[54]? »

13. Leonidas Lacedæmonius, quum dicerentur Persæ sagittarum multitudine nubes esse facturi, fertur dixisse: « Melius in umbra propugnabimus[55]. »

14. L. Ælius, prætor urbanus, quum ei jus dicenti picus in capite insedisset[56], et haruspices respondissent, dimissa ave, hostium victoriam fore, necata, populum Romanum superiorem, at L. Ælium cum familia periturum, avem occidit, nec dare pœnam dubitavit. Nostro ergo exercitu vincente, ipse cum quatuordecim Æliis ex eadem familia in prœlio est occisus. Hunc quidam non Ælium, sed Lælium fuisse, et Lælios, non Ælios periisse credunt.

15. P. Decius primo pater, postea filius in magistratu