cimum quemque militem, sorte ductum, fusti percussit[24].
35. Fabius Rullus consul ex duabus legionibus, quæ loco cesserant, vicenos sorte ductos in conspectu militum securi percussit.
36. Aquillius ternos ex centuriis, quorum statio ab hoste perrupta erat, securi percussit.
37. M. Antonius, quum agger ab hostibus incensus esset, ex his qui in opere fuerant, duarum cohortium militem decimavit, et in singulos ex his centuriones animadvertit, legatum cum ignominia dimisit, reliquis ex legione hordeum dari jussit.
38. In legionem, quæ Rhegium oppidum jussu ducis[25] diruerat, animadversum est, ita ut quatuor millia, tradita custodiæ, necarentur. Præterea senatusconsulto cautum est, ne quem ex eis sepelire vel lugere fas esset.
39. L. Papirius Cursor, dictator, Fabium Rullum, magistrum equitum, quod adversus dictum ejus, quamvis prospere, pugnaverat, virgis poposcit cæsum securi percussurus; nec contentioni aut precibus militum concessit animadversionem, eumque profugientem Romain persequutus est; nec ibi quidem remissionem supplicii prius meruit, quam ad genua ejus et Fabius cum patre provolveretur, et pariter senatus ac populus rogarent[26].
40. Manlius, cui Imperioso[27] postea cognomen fuit, filium, quod is contra edictum patris cum hoste pugna-
