præfecto equitum, quia hostibus cesserat, et parum instructam armis alam habebat, vestimenta per lictorem scidit, eidemque, ut erat fœdato habitu, perstare in principiis, donec mitterentur, imperavit.
29. Atilius Regulus, quum ex Samnio in Luceriam transgrederetur, exercitusque ejus obviis hostibus aversus esset, opposita cohorte, jussit fugientes pro desertoribus cædi[21].
30. Cotta consul in Sicilia, in Valerium, nobilem tribunum militum ex gente Valeria, virgis animadvertit.
31. Idem P. Aurelium, sanguine sibi junctum, quem obsidioni Lipararum ipse, ad auspicia repetenda Messanam transiturus, præfecerat, quum agger incensus, et capta castra essent, virgis cæsum in numerum gregalium peditum referri[22] et muneribus fungi jussit.
32. Fulvius Flaccus censor Fulvium fratrem suum, quia legionem, in qua tribunus militum erat, injussu consulis dimiserat, senatu movit[23].
33. M. Cato ab hostili litore, in quo per aliquot dies manserat, quum ter dato profectionis signo classem solvisset, et relictus e militibus quidam a terra voce et gestu expostularet, uti tolleretur, circumacta ad litus universa classe, comprehensum supplicio affici jussit, et quem occisuri per ignominiam hostes fuerant, exemplo potius impendit.
34. Appius Claudius ex bis, qui loco cesserant, de-
