Pagina:Frontin - Les Stratagèmes - Aqueducs de la ville de Rome, trad Bailly, 1848.djvu/262

Haec pagina emendata est
260
STRATEGEMATICON LIB. IV.

10. Antigonus, quum filium suum devertisse audisset in ejus domum, cui tres filiæ insignes specie essent, « Audio, inquit, fili, anguste habitare te, pluribus dominis domum possidentibus: hospitium laxius accipe. Jussoque commigrare, edixit, ne quis minor quinquaginta annos natus, hospitio matris familias uteretur[9]. »

11. Q. Metellus consul, quamvis nulla lege impediretur quin filium contubernalem perpetuum haberet, maluit tamen eum in ordine merere.

12. P. Rutilius consul, quum secundum leges in contubernio suo filium habere posset, in legione militem fecit.

13. M. Scaurus filium, quod in saltu Tridentino loco hostibus cesserat, in conspectum suum venire vetuit. Adolescens verecundia ignominiæ pressus, mortem sibi conscivit[10].

14. Castra antiquitus Romani, ceteræque gentes, passim per corpora cohortium velut mapalia constituere soliti erant, quum solos urbium muros nosset antiquitas. Pyrrhus, Epirotarum rex, primus totum exercitum sub eodem vallo continere instituit[11]. Romani deinde, victo eo in campis Arusinis circa urbem Beneventum[12], castris ejus potiti, et ordinatione notata, paulatim ad hanc usque metationem, quæ nunc effecta est, pervenerunt.

15. P. Nasica in hibernis, quamvis classis usus non esset necessarius, ne tamen desidia miles corrumperetur, aut per otii licentiam sociis injuriam inferret, naves ædificare instituit.