rem spernendam ratus, disposuit in insidiis lectissimam suorum manum. Ab ea Galli excepti, dupliciter Hannonis consilio satisfecerunt, et Romanos ceciderunt, et ipsi omnes interfecti sunt.
4. Hannibal simili consilio se a transfugis ultus est. Nam quum aliquos ex militibus suis sciret transisse proxima nocte, nec ignoraret, exploratores hostium in castris suis esse, palam pronuntiavit, non debere transfugas vocari sollertissimos milites, qui ipsius jussu exierint ad excipienda hostium consilia. Auditis, quæ pronuntiavit, retulerunt exploratores ad suos. Tum comprehensi ab Romanis transfugæ, et amputatis manibus remissi sunt.
5. Diodorus, quum præsidio Amphipolim tueretur, et duo millia Thracum suspecta haberet, quæ videbantur urbem direptura, mentitus est, paucas hostium naves proximo litori applicuisse, easque diripi posse. Qua spe stimulatos Thracas emisit, ac deinde clausis portis non recepit[72].
1. Romani, qui in præsidio Panormitanorum erant, veniente ad obsidionem Hasdrubale, raros ex industria in muris posuerunt defensores: quorum paucitate contempta, quum incautus muris succederet Hasdrubal, eruptione facta, ceciderunt eum.
2. Æmilius Paullus, universis Liguribus improviso
